بيروت الحلم

بيروتْ يا قَطر النّدى

وضِحكِةْ الجُورْ مْشَرَّدا

عَ نَكِبْتِكْ يِتْم القَلبْ

غَصّ النّبض.. راح الصَّدى

صَرخَاتْ زَوجِةْ تْرَمَّلِتْ

وإمّ الْـ عَلى إِبنا بِكِتْ

دَمعات كَمْ خَيّْ وإخِتْ

غَمرِةْ حَنانِكْ تِسْعِدا

بيروت.. يا قَلب البَلَدْ

يا حِلْم بِ خاطِرْ وَلَدْ

ما بْعُمرو بيعيش الجَسَدْ

لو قَلبو هالكَفَنْ ارتَدى

حْروفِك مَنارَةْ بالعَتِمْ

بتِمحيلك جْبال الظُّلُمْ

رح تبقى بيروت الحِلِمْ

ونِبني الحياةْ مْنِ الرَّدى

قُومي احمِلي شِعِلِةْ أَمَل

بهالدّنيي ما يْدومْ الزَّعَلْ

لَيْكو القَمَرْ.. فيكِ اكتَمَلْ

مَسَّحْ دْموعِك عَالهَدا